Chinese kawng siamtuten Arunachal an lut, buaina chhuak zui lo

Chinese kawng siamtute chuan December thla tawp lam khan India ramchhung rawn lutin Arunachal Pradesh-ah kawng an rawm siam tih official-te chuan sawiin, heng kawng siamtute hi India sipaiten an lo dang a, buaina erawh a chhuak zui lo nia tarlan a ni.

Tarlan dan chuan Chinese kawng siamtute hian December 26 vel khan India ramri an rawn lut a, India-Tibetan Border Police post aṭanga km 2 vela hlaah kawng siam hna hi an rawn ṭan a ni. Kawng metre 600 a sei leh ft 12-a zau an siam hman niin an sawi. Chinese hnathawhktute kawng rawn siamna hi Brahmaputra-in India ram a rawn luanluhna bul lawk a nih thu official te chuan sawiin, India sipaite chuan an nawr kir leh tih an sawi.

Buaina chhuak zui lem lo mah se India sipaite chuan ramri hi uluk takin an veng zui a, kawng an rawn siamna hmunah pawh hian venhimna khauh zawka kalpui nghal a ni. China lam hian an hmanruate hi lakkir leh an duh nia tarlan a ni bawk.

Hetih lai hian China chuan thuchhuah siamin, 'Arunachal Pradesh' a awm a hriat ngai loh thu a sawi mauh mai. Chinese Foreign Ministry thupuangtu Geng Shuang chuan, Chinese miten India ramri an kan nia tarlan chu chhangin, ramri chungchangah an chian tawk thu a sawi. Shuang chuan an ramri chin an hriat chian thu sawiin 'Arunachal Pradesh' tia an koh chu an hriat ve ngai loh thu a sawi a ni.

China hian Arunachal hi South Tibet ram bung pakhatah a ngai a, a ram chin niin a chhal a ni. India-China border inchuh, Line of Actual Control (LAC) hi km 3,488 zeta thui a ni. Geng chuan China leh India-in ramri chungchangah an ram chin an hrechiang ve ve nia sawiin, ramriah remna leh muanna a awm theih nan an thawk ve ve niin a sawi thung.

China leh India hian December 22 khan New Delhi-ah ramri chungchagah inbiakna an nei a, Geng chuan ram pahnihte hian inlaichinna ṭha an neih theih nan theihtawp an chhuah niin a sawi. Ramriah pawh hian remna leh muanna a awm theih nan hma an la dawn niin a sawi bawk.

China leh India hian Arunachal Pradesh chungchangah hian vawi tam tak inhmuhthiam lohna an lo nei tawh a, nikum kumtawp lama ramria India sipaite India Defence Minister Nirmala Sitharaman-i'n a tlawh ṭum khan China hian nasa taka sawiselin, India chuan remna a duh lo niin a lo puh tawh bawk a ni.

Tibetan Spiritual leader Dalai Lama-a'n Arunachal a tlawh ṭum pawh khan China hian a lo sawisel tawh bawk a ni.