NRC : Mamata-i'n BJP sorkar dem

West Bengal Chief Minister Mamata Banerjee chuan National Register of Citizens (NRC) kalpui danah thil dik tawk lo eng emaw zat a awm tih sawiin, hemi chungchanga hian BJP kaihhruai sorkar chu mawhphurtuah a puh.

Assam sorkar leh sorkar laipui ṭangkawp chuan Assam-a ramdang mi awmte khua leh tui nihna pek an nih lohna tur leh, ram leilung fate humhimna turin NRC hi an kalpui a, December 31 khan a list hi tlangzarh a ni. List tihchhuahah hian MP ni lai leh MLA hlui eng emaw zat hming a lang lo a,hei hian sawi zui a hlawh hle a ni. NRC kalpui danah thil dik tawk lo leh felhlel awm nia a lan avang hian politics-a inbeihna a chhuak nghal a, BJP chuan kwng hrang hrangin beih an tawk mek.

West Bengal Chief Minister Banerjee chuan, "NRC kalpui danah hian thil felhlel eng emaw zat a awm a, Assam-a Bengali chengte pawh an hming tarlan a ni lo. Hetianga ram leilung fate ngei pawh an hming paih a nih avang hian BJP sorkar chu mawhphurtu an ni a, an demawm tak zet a ni" a ti. Trinamool Congress hruaitu hian BJP hi na takin a sawisel a, party mi leh sate uchuak tak duhsakah a puh bawk.

Hetih lai hian Assam BJP president Ranjit Das chuan NRC kalpuia thil dik tawk lo awm hi siamṭhat a nih theih nan hma lak a nih tur thu a sawi. Ranjit Das chuan,"List-a hming lang lo politician eng emaw zat an awm hi a pawi tak zet a ni. Chutih rual chuan politics-a hamṭhatna atana hman tum an lo awm hi a pawi ka ti a, a bik takin state dangte chu lo inrawlh lo turin kan duh a ni" a ti. Assam-ah BJP mi leh sa nuai 27 vel an awm tih sawiin, Trinamool Congress activist te chu an state-ah buina chawkchhuak lo tura a duh thu a sawi bawk.

List tihchhuaha MP leh MLA eng emaw zan hming a lan loh laiin, ULFA hruaitu Paresh Baruah hming erawh tarlan a ni thung. Hei hi mi tam tak chuan an hrethiam lo a, politician chal lang tak takte hming hmaih a awm lai a, helpawl hruaitu hming chuang hi an pawm theih loh thu a sawi. Hming lang lo zingah hian All India United Democratic Front (AIUDF) hruaitu leh Dhubri Lok Sabha MP ni bawk Badruddin Ajmal a tel a, a afte hming a lang lo bawk. Hetih lai hian Barpeta Lok Sabha MP Sirajuddin Ajmal hming pawh alang bik lo a, a ni bakah hian MLA hlui eng emaw zat chu an hming a lang lo bawk.

Supreme Court thupekin Assam-ah hian NRC hi kalpui a ni a, ramdang aṭanga Assam-a pemlut ṭhinte dang tur leh, khua leh tui nihna pek an nih lohna tura hmalakna a ni.