Maghalaya leh IOA-te'n 'Host City Contract' ziak

Meghalaya leh Indian Olympics Association (IOA) chuan Nilaini khan "Host City Contract" an ziak a, he an contract ziah hi 39th National Games 2022 atana inremna thuthlung a ni.

Meghalaya state sorkar hian Meghalaya State Olympics Association (MSOA) leh IOA ten contract an sign hnu hian, National games 2022 hi an thlen dawn avang hian contract fee cheng vaibelchhe 4.5 IOA hnenah hian an hlan nghal bawk a ni tih a sawi. Kum 2022 hi Meghalaya state nih kum 50-na chiah a ni ve bawk dawn a ni.

MSOA Working President John F. Kharshiing chuan Meghalaya chu History-ah a lan tawh dawn thu sawiin, National Games 2022 hian Olympic Map-ah Meghalaya chu a dah tawh dawn niin a sawi. John chuan National Games hma hian Meghalaya hming chu nasa taka sawi a ni anga, Games hnu lamah phei chuan nasa leh zuala sawi a ni dawn a ni, a ti.

Sports and Youth Affairs Director, Matsiewdor War Nongbri pawhin Meghalaya chuan National Games hmaa hna tam tak thawh tur an neih thu leh an theih tawp an chhuah tur thu a sawi ve bawk.

Meghalaya hi hmarchhak state zinga National games host thei tur pathumna an ni dawn a, 1999 khan Manipur in lo host tawhin 2007 khan Assam in an lo thleng tawh bawk a ni.