Tripura inthlan turah hlauhna rau a leng : BJP

Bharata Janata Party (BJP) chuan Ningani khan Election Commission chu Tripura inthlan hunah micro-observer, Communist Party of India-Marxist (CPI-M) mi ni lo dah turin an ngen a, paramilitary force tam thei ang ber dah an phut thu an sawi bawk. Heitianga an ngen chhan hi Tripura mipuiten inthlan awm tur chungchangah hlauhna rilru mipuiten an put nasat vang niin an sawi.

BJP hruaitu leh North East Democratic Alliance (NEDA) convener ni bawk Himanta Biswa Sarma chuan election duty-ah pawh sorkar official-te chiah dah ni se an duh thu a sawi a, chung official-te pawh chu political party leh eng trade union maha inhnamhnawihna nei lo ngei ni se an duh thu a sawi. Sarma chuan CPI-M-te'n Tripura sorkar hnathawkte hnenah membership an pek thu sawiin, micro-observer dah turte pawh state pawn mi ni thei se an duh thu EC hnenah an thlen niin a sawi. Left party te chu booth chhunga dah chi an ni lo niin a sawi bawk.

Assam education minister ni bawk Sarma chuan, CPI-M-te'n BJP party worker 60 chuang an that tawh niin a sawi a, hemi a nih avang hian hlauhna rilru mipui ten an nei nasa hle a ni, a ti. Inthlanna dik leh felfai tak a awm theih nan EC hnenah paramilitary force tam thei ang ber dah turin an ngen tih a sawi bawk.

CPI-M te hian 1993 aṭang khan Tripura-ah hian ro an rel tawh a, Congress party nen an inel ber ṭhin. Mahse tunṭum inthlan awm turah hi chuan BJP-in hma nasa taka an lak avangin khingpui tur dang an neih belh dawn a ni. Tripura-ah hian sorkar lai term hi kumin March hian a tawp tawh dawn a ni.