Assam-a Muslim-ten two-child policy an pawm : CM Sarma

Assam chief minister Himanta Biswa Sarma chuan state sorkar scheme hrang hrang hnuaia hamṭhatna dawng thei turah fa pahnih nei chin, two-child policy kalpui an tum chu Assam leilung fa, Muslim-te chuan an pawmpui tih a sawi.

Two-child policy kalpui tum chungchangah CM hian Pathianni khan Muslim pawl hrang hrang aiawh leh mithiamte a sawipui a ni. An state chu India ram state ṭha panga zinga hlankai an tum chuan mihring pung chak lutuk chu khuahkhirhna siam a ngai a ni, tiin a sawi. He policy hi an state-a sakhaw tlem zawk, a bikin Muslim-te hmasawnna tur leh retheihna umbona atan a pawimawh tih a lo sawi tawh a ni.

Pathiannia meeting-ah hian Assam ṭawng hmang Muslim aiawhte sawm an ni a, state pawn aṭanga pem lut, Bengali ṭawng hmang Muslim aiawhte chu meeting a neihpui ve leh dawn tih Sarma chuan a sawi.

CM chuan state chhunga Muslim pawl hrang hrang aiawhte telna tur sub-group pariat chu sorkarin a siam dawn a, an ni hian health, education, skill development, population stabilisation, preservation of cultural identity, financial inclusion, leh women empowerment chungchangte zirchiangin, thla thum hnuah rawtna an thehlut dawn tih a sawi. "Heng group-te rawtna aṭang hian sorkar chuan state chhunga Muslim-te thuam chakna tur, kum nga chhung hman tur chu a duang dawn a ni," a ti.

Family planning policy siam rawtna chu Muslim-te lam aṭangin dodalna a awm lo tih Sarma chuan kar liam ta khan a lo sawi tawh bawk a, All-Assam Minority Students’ Union aiawhte pawhin ṭum hnih hmuin, Assam-a Muslim-te tan population control a ngaih thute pawh an hrilh tih a sawi.

Two-child policy bill hi tun thlaa budget session neih hunah sorkar chuan a pharh dawn a, pass a nih chuan state sorkar hnuaia hna lak leh scheme hrang hrang hamṭhatna dawng turah fa pahnih nei chin bithliah an ni dawn a ni.