Ṭhenawm state-te'n Assam forest ram an luah kan remti ngai lo ang : Assam minister
Assam environment and forest minister Parimal Suklabaidya chuan Assam forest ram chu ṭhenawm state-ten an luah an remti ngai dawn lo tih Pathianni khan a sawi.
Lakhimpur-a a enkawl department dinhmun leh hmalakna hrang hrangte thlirin Suklabaidya chuan, "Assam forest ram chu inches khat pawh ṭhenawm state-ten an luah kan remti dawn lo a, lo luahte pawh hnawhchhuah vek an ni ang," a ti. Forest Regulation Act hnuaia land rights neite chu hnawhchhuah an ni dawn lo a, mahse he danin a huam tel ve lohte erawh chu awm an remti dawn lo tih a sawi a ni.
Assam forest official-ten an tarlan danin Lakhinpur district-a forest land hectare 2,436-a zau chu Arunachal Pradesh lamin an luahsak a, hei bakah hian hectare 4,440-a zau chu tualchhung miten an luah bawk niin an sawi. Hectare 23 huam chhunga awmte chu hnawhchhuah an ni tawh a, Pobha reserve forest-a awmte hnawhchhuah tum an ni bawk.
BJP kaihhruai sorkar hian June thla khan phalna nei loa lut, forest land hectare 3,400-a zaua awmte chu hnawhchhuah an ni tawh tih a sawi a, kumin April leh June thla inkar khan hectare 915.50-a zau chu thenfai a ni tawh bawk niin an sawi.