Raijor Dal-in AJP nena thawhdunna titawp

Raijor Dal president Akhil Gogoi chuan All Assam Students Associa­tion (AASA) general secretary hlui Lurinjyoti Go­goio kaihhruai, regional party Assam Jati­ya Parishad (AJP) nena an thawhdunna an titawp tih Pathianni khan a sawi.

Raijor Dal leh Assam Jatiya Parishad-te hi regional party thar niin, central-a BJP sorkari Citizenship Amendment Act (CAA) a siam duh lohna kal zel aṭanga din an ni. Kumin February thla khan party pahnihte hian March-April thlaa assembly inthlana neiha thawhdun an rel a, mahse inthlanah hian AJP hian seat an la lo a, RD hian seat khat lain, party president Gogoi chu independent MLA-a thlan tlin a ni.

Gogoi chuan, "In­thlanah pawh khan ṭang­rual pawl angin kan awm lo a, inthlan lai mek khan kan inzawmna pawh kan titawp a ni," a ti. Inthlanah pawh khan party mal angin an chuh tih Gogoi chuan a sawi. Mahse party pahnihte hian inthlan neih lai khan an thawhdunna a chhiat thu hi an sawilang lo.

Assembly seat 126 awmah AJP hian seat 83-ah an chuh a, RD-in seat 38-ah an chang thung. Bial 16-ah party pahnihte hian a hranin candidate an siam a ni. Gogoi hi CAA dodalna lantira buaina chhuak kaihhnawihah kum 2019, December thlaah man niin, jail tang chungin Sivasagar bialah a ding a, campaign pawha chhuak thei lo chungin thlan tlin a ni a, Assam-a jail tang lai MLA atana thlan tlin hmasa ber a ni. July 1 khan special National Investigation Agency (NIA) court chuan Gogoi leh a thawhpui pathumte laka thubuai siamsak chu titawpin, thiam a chantir a, chhuah zalen a ni tawh a ni.