Arunachal-ah film & television institute din a ni dawn : Jitendra Singh

Union Minister of State for Ministry of Development of North Eastern Region Dr Jitendra Singh chuan Arunachal Pradesh-ah Film and Television Institute din a nih tur thu Inriini khan a sawi. Minister chuan sorkar laipuiin hmarchhak ṭhalaite zinga theihna awmte haichhuah sak tura hmalakna pakhat a nih thu a sawi.

Arunachal-ah hian Film and Television Instutute hi din a nih chuan India rama a pahnihna tur a ni dawn a, a hmasa ber chu Pune-a Film and Television Institute of India (FTII) a ni.

FTII hi autonomous institute niin, Information and Broadcasting Ministry hnuaiah a awm a ni. Minister of State for Prime Minister Office ni bawk Jitendra Singh chuan Arunachal Pradesh-a a hmasa ber turin institute hi din tum a nih thu a sawi. Singh chuan tun hnaiah Arunchal hian film pahnih chauh an tihchhuah thu sawiin, film siamna tur hmanrua leh infrastructure an neih ṭhat tawk loh vang a nih thu a sawi bawk.

Singh chuan South India chu independence hma kha chuan film lama hma la hmasa pawl an nih thu sawiin, khang hunlai khan Bollywood leh Tollywood te a la awm lo a ni, a ti. Chumi a nih avang chuan khang hun laia film studio lar AVM, Gemini leh L V Prasad te kha film siamtu ber an nih thu a sawiin, actor leh actress lar zawng zawng pawh South India lam mi vek an ni. Film lama hma la thar leh tur pawh hian South Indian film Industry te an pawimawh a ni, a ti.

Singh hian ‘Indian En­tertainment Industry: Global Leader in Making’conference-a thu a sawi naah he thu hi sawiin, he conference hi Bharat Niti leh South India Film Chamber of Commerce-te huaihawt a ni. Singh chuan vantlang hmaa an thu tarlan duhte tarlan nan politician-te tan pawh drama a pawimawh thu a sawi a, social message awm lo entertainment chuan awmzia a nei lo, tiin a sawi a ni.