Arunachal Pradesh-a China lo lut kha tum reng vang a ni lo : NSC

Kum liamta December 26-a China kawng siamtute'n India-China border kan a, Arunachal Pradesh-a kawng an rawn siam kha an tum reng vang a nih loh thu leh hnathawktuten an hriat loh vang a nih thu, National Security Council official-te chuan an tarlang. He report siamtute hi ram vehnimna chungchanga Prime Minister thurawn pe ṭhintu apex body-te an ni.

National Security Council report-in a tarlan dan chuan China aṭanga lokal kawng siamtute khan India ram chinah an awm tih kha Indo-Tibetan Border Police (ITBP)-te'n an lo dan tak hnuah khan an hre chauh niin a tarlang. Heng hnathawktute hi Chinese People's Liberation Army nen inkungkaihna an nei lo nia tarlan a ni bawk. China miten ramri an kanna lai hi Upper Siang District-a Bishing hmun a ni a, China aṭanga Brahmaputra lui rawn luan luhna bul lawk niin, ramri an kanna hi Line of Actual Control (LAC) hrul a ni bawk. He lai hmunah hian ram pahnihte hian ramri chin mumal takin an in sem fel thei lo a ni.

Kawng siamtute hian India ram chianah hian metre 600 a thui, feet 12-a zau kawng an siam hman a, mahse ITBP te hian an lo dang tih thudawnna chuan a tarlang. Security force-te'n an lo dan takah hian kawng siamtute hi an tlan chhia a, an kawng siamna hmanruate pawh an hnutchhiah a ni. Report-in a tarlan danin China lam hian India lam hi rawn be tawhin an hmanruate pawh an dil let a, heng an hmanraw hnutchhiah zingah hian JCB leh water tanker te pawh a tel a ni.

Thudawnnain a tarlan dan chuan India chuan heng hman­ruate hi peklet leh a inpeih reng a, border meeting an neih leh velah pek let leh nghal a tum nia sawi a ni. India leh China hian ramri km 4,000 zeta thui an inṭawm a, rarmri lai takah hian hmun zau loteah an inrem thei lo a ni. China hian Arunachal Pradesh hi a ram chinah ngai mah se, New Delhi chuan neitu nihna a hauh ve tlat thung a, hetih lai hian Aksai Chin chu India chuan a ram chinah ngai mah se Beijing thuneihna hnuaiah a awm thung.

December thla khan a vawi 20-na turin Indian National Security Adviser Ajit Doval leh Chinese State Councillor and Communist Party of China leader Yang Jiechi-te chuan ramri chungchangah hian meeting an lo nei tawh bawk a ni. Ram pahnih te hian an inrem lohna leh inhmuhthiam lohnate chu ṭha taka chinfel an remti ve ve bawk.