Congress-in NRC chungchanga Mamata-i thu sawi pawm lo

India sorkara eptu party lian ber Congress chuan West Bengal Chief Minister Mamata Banerjee-i'n National Register of Citizens (NRC) chungchanga a thusawi chu an pawm loh thu Pathianni khan sawiin, thu behchhan nei lo leh puitlin loh thlak tiin an sawisel.

Mamata Banerjee hian kar kalta Nilaini khan Bharata Janata Party (BJP) chu Assam aṭanga Bengali umchhuahna hmanrua atana NRC hmangah a puh a, list tihchhuah hmasak berah pawh Bengali eng emaw zat an tel lo niin a sawi bawk. Assam Pradesh Congress Committee President Ripun Bora chuan Mamata Banerjee-i'n hetiang thu a sawi chhan hi an hriat loh thu leh thu behchhan nei lo a nih thu a sawi a, NRC final list a chhuah hma chu mi tumahin hetiang lam hawi thuchhuah hi nei tawh lo se a duh thu a sawi.

Bora chuan hetiang hawi zawnga thusawi hian tumah a ṭanpui lo nia sawiin, midang rilruah nghawng ṭha lo a nei zawk niin a sawi bawk. NRC chu India khua leh tui tan a nih thu sawiin, Bengali leh Bihari chungchangah pawh Assam aṭanga paihchhuah an nih ngawt theihna chhan a awm lo niin a sawi a, Banerjee-i pawh thuchiang hre loah a puhlet bawk.

Congress chuan BJP hmalak dan chu uluk taka an enfiah thu sawiin, Bora chuan India mi tawh phawt chu ziahluh an nih ngei theih nan leh ramdang mite chu ziah luh an nih loh nan an enfiah reng dawn thu a sawi. Bora chuan India mi NRC-a tel lo an awm a nih phawt chuan dan ang taka hma an lak tur thu a sawi bawk. Kar kalta Nilaini khan Mamara Banerjee-i chuan sorkar laipui chu Assam aṭanga Bengali paihchhuah tumah a puh a, mi vaibelchhe 1.25 vel paihchhuah tumah a puh a ni.

NRC draft list hmasa ber hi December 31 zan khan tlangzarh a ni a, list-a tel tura dilna thehlut mi vaibelchhe 3.29 zingah list tarchhuah hmasak berah hian mi vaibelchhe 1.9 chiah an tel a, hemi a nih avang hian mi tam takin an sawisel a ni. NRC list tarlan hmasak berah hian MP leh MLA hlui eng emaw zat hming a lang lo a, hetih lai hian ULFA hruaitu Paresh Baruah hming a lang thung. Union Finance Minister Rajnath Singh chuan India khua leh tui tawh phawt chu list-ah telh an nih vek tur thu a lo sawi tawh bawk.