Nagaland : Pressure Group-te'n Inthlan ṭhulh hrih turin PM Modi ngen

Nagaland inthlan hun tur chu tunkar chhunga puanchhuah a nih mai beisei a nih laiin pressure group te chuan kum 70 chhung teh meuh buaina a awm tawh avangin election chu ṭhulh rih turin Prime Minister Narendra Modi hnenah ngenna an thehlut.

Nagaland Assembly member 60 awmna hi March 12, 2019 hian an term a zo dawn a, hetih lai hian Against Corruption and Unabated Taxation (ACAUT), eirukna dotu pawl chak tak chuan State chhunga President's Rule kalpui turin PM Modi hnenah hian ngenna hi an thlen a ni. ACAUT bakah hian Nagaland Tribes Council (NTC), Central Nagaland Tribes Council (CNTC) leh Gaon Burrah Fede­ration of Nagaland (GBFN)-te chuan Pathianni khan Prime Minister hnenah memorandum hran an thehlut bawk a ni.

August 3, 2015-a sorkar laipui leh National Socialist Council of Nagaland Issac-Muivah (NSCN-IM) ten Framework Agreement sawizui hlawh tak an ziah leh, nikuma sorkar leh Naga National Political Group paruk working committee ten inremna an ziah baka inremna zawnga hmalakna hrang hrang awmte chu inthlan hi neih a nih chuan a buai zo vek dawn niin, NTC chuan an sawi.

ACAUT pawhin dan pangai anga Nagaland a inthlan hi kal­pui a nih chuan Naga political group paruk te leh NSCN-IM-te inremna ziahpui chu awmze nei lo a ni dawn niin a sawi bawk.