Arunachal ramri kan chungchang chinfel a ni tawh : Army Chief

Tun hnaia China hnathawktuten ramri kan a, Arunachal Pradesh chhunga kawng an siam chungchanga India leh China inkara buaina awm chu chinfel a nih tawh thu, Army Chief General Bipin Rawat chuan Thawhṭanni khan a sawi. Bipin Rawat chuan Doklam area-a China sipai awm zat pawh nasa taka tihtlem a nih thu a sawi bawk.

Delhi-a thu a sawinaah Army Chief chuan Tuting (China kawng siamna hmun) buaina chinfel a ni ta, tiin a sawi a ni. General Rawat chuan hemi chungchangah hian ni hnih kalta khan Border Personnel Meeting neih a nih thu a sawi bawk. Sikkim sector-a India-China border chungchang, ram pahnihin Doklam-a ni 73 chhungzet an inepnaah pawh China chuan a sipai tamtak ala kir tawh niin a sawi bawk.

Chinese kawng siamtuten December 26 khan India ram chin, Arunachal Pradesh-ah kawngpui meter 600 a thui, feet 12-a zau an siam a, hei hi India sipaite chuan lo dangin kawng siamtute hi an tlanchhe nghal a ni. Kawng siamtute hian an hmanrua JCB leh water tanker te an kalsan a, China chuan hei hi an tum reng vang a nih loh thu leh kawng siamtute hian an hriat loh avanga ramri hi kan an nih thu an lo sawi tawh a ni. Hemi a nih avang hian China chuan an hmanruate hi laklet leh India hnenah a dil a, India pawhin border meeting neih a nih leh velah pek let a nih tur thu an lo sawi tawh bawk a ni.

He thil thlengah hian Rawat chuan Chinese People’s Liberation Army (PLA)-te chuan inrawlhna an nei lo niin a sawi a, India sipaiten an lo dan hnu pawh hian buaina a chhuak zui lo tih a sawi. Hetih lai hian Army Chief hian a hmain India chu hun lo kal tura indona awm thut thei laka a inralrin a pawimawh thu a lo sawi tawh a, ralthuam leh sipaite chu kawng engkima thuam chak a ṭul thu a sawi a ni.