Assam-a district 7-ah complete lockdown puang

Assam sorkar chuan Covid-19 hri kai thar an pun zel avangin vawiin aṭangin district pasarih-ah complete lockdown a puang.

Complete lockdown puanna district-te chu - Goalpara, Golaghat, Jorhat, Sonitpur, Biswanath, Lakhimpur leh Morigaon-te an ni. District dang pahnih, Sivasagar leh Dibrugarh dinhmun pawh thlithlai mek a nih tih Assam State Disaster Management Authority chuan a sawi.

Lockdown puanna bialah hian dawr leh sumdawnna hmunte khar vek a nih bakah public leh private transport pawh khap a ni a, bungrua phur erawh an tlan phal a ni ang. District dang nena inkalpawh khap a ni bawk.

Assam-ah hian Thawhṭanni khan hri kai thar mi 2,640 awm belhin, hri kai hmuh chhuah tawh hi mi 5,19,834 an tling tawh a, an zinga 4,683 in an thihpui tawh a ni.