Naga pawl hrang hrangten AFSPA sût turin phût

Sorkar laipuiin Naga­land state pum 'disturbed area'-a puan chhunzawm a, sipai hnena thuneihna sang pek Armed forces (Special Powers) Act (AFSPA) thla ruk dang a pawhsei leh chu Naga pawl hrang hrangten an sawisel nasa hle a, thupek hi sût leh nghal turin an phût.

June 30 khan sorkar laipui chuan Nagaland-ah AFSPA hi thla ruk dang, kumin December thleng hman chhunzawm a ni dawn tih a lo puang tawh a ni.

Naga Hoho chuan Naga civil society organi­sation hrang hrang leh human rights ativist-ten dan sakei tia sawi ṭhin, AFSPA hlip tura an ngen reng chunga sorkar laipuiin thla ruk a pawhsei sak leh chu an lungawi lo hle tih an sawi. "Democracy ramah, civilised society hnuaiah he dan sakei hmanna tur chhan hi a awm tawh lo," tiin an thuchhuahah an tarlang.

An state-a sorkar awm tawhte leh sorkar laite, political party hrang hrangte pawhin he dan hman a ni chunga an ngawi reng thei chu vanduaithlak an tih thu Naga Hoho chuan an sawi bawk.

Sorkar laipui leh Naga mipuite'n inremna siam tumin inbiakna an nei mek a, Nagaland boruak pawh a muanawm a, hetih laia inrintawnna tichhe thei zawnga thiltih chu a ṭha lo hle a an ngaih thu an sawi.

Global Naga Forum (GNF) pawhin thuchhuah siamin, Indo-Naga political issue chinfelna tur te, Nagaland-a boruak ṭha a awmna turin AFPSF hlih chu a hun tawh hle tih an sawi. Sorkar laipuiin he dan a rawn pawhsei leh chu Naga mipuite tan a lungchhiathlak a, AFSPA chu modern civilised nation leh rule of law zah lohna lantirna zawk a ni, an ti.

GNF chuan AFSPA chu democracy kalh a nih mai bakah, Indian Army-ten Naga mipuite dikna chanvo an palzut sakna a ni tiin, modern India-a mipuite hrekna hmanrua a ni, tiin an sawi.