Nagaland-in thei ṭiak 22,000 sem

Nagaland sorkar chuan Phek district-a thingtlang khaw hrang hrangah thei ṭiak 22,000 a sem.

Minister for Planning & Coor­­dination, Land Revenue and Parlia­mentary Affairs Neiba Kronu chuan Ptufsero assembly constituency chhunga thingtlang khaw 12 tan Thawhṭanni khan avocado, persommon, chestnut, tamarillo, yong­chak leh local herbal tree (lengotshe) ṭiak hi a sem a, an thei ṭiak sem hi cheng nuai 10 man hu a ni.

Minister chuan thei ṭiak phun hi climate change venna tur kawng khat, leilung humhalhna tur a ni tih sawiin, he project hi Local Area Development Programme (LADP) kaltlanga siam a ni tih a sawi. Economy chawikanna pawimawh tak a ni bawk a ni, a ti. An state leilung chu a ṭha a, thei leh thlai chi hrang hrang chinna tlak a ni tih a sawi bawk.

Kronu chuan Naga­land-a entre­preneurship chawikanna tura thawktu leh loneitute thlai thar chhuah hralhna tur buaipuitu, Entrepreneurs Associate-te hma laknaah lawmthu a sawi bawk a ni.

Entrepreneurs Asso­ciate-a chief executive officer, Neichute Doulo chuan he project hi Pfutsero bial chauh ni lo, constituency dang pawhin an chhawr ṭangkai dawn hle tih a sawi. Eizawnna nghet siamsakna tur chauh ni lo, leilung humhalhna tur pawimawh tak a ni tel bawk a ni, a ti.