Security force leh ULFA-I inkap

Assam-Aruncahal Pradesh border bula Ka­korani Reserve Forest-ah Pathianni zan khan Assam Rifles-te leh hel pawl - United Liberation Front of Assam-Independent (ULFA-I)-te chu inkapin, hel pawl mi leh sa pahnih kah hliam an nih thu Defence official-te chuan an tarlang.

Defence thupuangtu Colonel Chiranjit Konwer chuan helte hi Kakorani Reserve Forest-ah hian an awm tih thu an dawn bawhzuia kal an nih thu a sawi. Hel bei tur hian Assam Rifles-te hi he lai hmunah hian Pathianni zan khan an kal a, a hmun an va thlen hian helte nen hian an inkah thu leh ULFA-I mi pahnih kah hliam an nih thu a sawi.

Konwer chuan khua a thim avang leh khua a ṭhat loh bakah chhum a zin nasat avangin hel pawlte hi an tlanchhe hman tih a sawi a, security force-te chuan hel pawl laka hian beihpui an thlak zui thu a sawi bawk. Assam Rifels-te hian kar liamta lawk January 5 khan Arunachal Pradesh, Changlang District-a Nam­dapha Reserve Forest-ah ULFA-I-te tawmbuk an lo tihchhe tawh bawk a, hemi ṭum hian document pawimawh eng emaw zat an hmuchhuak bawk a ni.

Assam leh South Aru­nachal Pradesh-ah hian Republic Day muanawm tak hman a nih theih nan Security force-te hian hma nasa takin an la zel dawn tih official-te chuan an sawi bawk.