Nagaland Health Minister-in inthlan hun sawn thlawp
Nagaland Health and Family Welfare Minister Imkong Imchen chuan Naga pressure group hrang hrangten inthlan hun sawn tura an nawrna chu a thlawp thu Thawhlehni khan a puang.
Naga pressure group hrang hrangte hian kum 70 zet Naga political issue chinfel loh a awm tawh chu chinfel an duh avangin Prime Minister Narendra Modi hnenah inthlan tur hi ṭhulh a nih theih nan memorandum an thehlut a ni. March 13, 2019-ah Nagaland Assembly member 60 awmna term hi a zo dawn a, tunkar chhung hian inthlan hun tur hi puanchhuah a nih beisei a ni a, hemi a nih avang hian pressure group-te chuan PM hnenah inthlan hi ṭhulh tur leh president's rule kalpui hrih mai turin an ngen a ni.
Minister Imchen chuan assembly inthlan hun chu Naga political issue chinfel a nih theih nan sawn ṭul a tih thu a sawi. Sorkar aiawh thuchhuah siamtu RN Ravi pawhin buaina chinfelna tur hmawr bawk a nih ṭep tawh thu a lo sawi tawh bawk avangin inthlan hi sawn tura hmalakna awm chu a thlawp thu a sawi a ni. Imchen chuan inthlan hi Naga political issue nena khaikhin chuan thil lian a ni lo a ni, a ti bawk.
Naga Assembly dinglai mek chuan buaina chinfel nana hma nasa tak an lak a nih tawh thu leh sorkar laipui nen pawha inbiakna vawi eng emaw zat an lo kalpui tawh bawk avangin Imchen chuan inthlan hun chu buaina chinfel a nih hma chuan sawn hrih mai ṭha a tih thu a sawi uar hle. Hetih lai hian inthlan hun tur chungchanga thuneitu dik tak chu sorkar laipui an nih thu a sawi bawk.