Assam NRC draft-ah ram luahtu dik tak an tel lo - Mamata Banerjee

Assam-a Bharata Janata Party (BJP) sorkarin National Register of Citizens (NRC) a kalpui mekah Bengali leh Hindi ṭawng hmang mi tam tak an hmaih niin West Bengal Chief Minister chuan Thawhlehni khan a sawi a, an state mipuite chu Assam aṭanga West Bengal-a tlan lut an awm phawt chuan chenna tur lo ngaihtuahsak inpeih turin a ngen.

Mamata Banerjee chuan Assam sorkar chu Assam aṭanga Bengali ṭawng hmang umchhuah tumah puhin, ram luahtu diktak pawh list-ah hian an telh chuang lo niin a sawi. NRC-a inziahluh tum mi vaibelchhe 3.30 zingah mi vaibelchhe 1.29 chu an telh duh lo nia sawiin, heng zingah hian Bengali leh Hindi ṭawng hmangte an tel a ni, a ti. Alipurduar district-a mipui pungkhawm hmaa thu a sawiah Banerjee-i chuan, "Mi tupawhin hrehawm ti tak chunga Bengal an lo luh chuan lo hnar lo ula, chenna tur lo ngaihtuah sak rawh u" a ti. West Bengal CM chuan BJP leh an party kaihruaitu nia sawi Rashtriya Swayamsevak Sangh (RSS)-te chu sawisel nghalin, naupang lehkha zirte rilruah thil dik lo tak tuh an tum niin a sawi bawk.

Mamata Banerjee-i hian kar liamta Nilaini khan Assam sorkarin NRC a kalpui dan hi nasa takin a lo sawisel tawh a, Assam aṭanga Bengali-te umchhuah tumna hmanruai a nih thu sawiin, a dem thu a sawi uar hle. Hetih lai hian Congress party official-te chuan Banerjee-i hi an lo khak tawh bawk a, BJP MP Subramanian Swamy pawhin Banerjee-i chu Supreme Court thupek a pawm duh lo a nih chuan amaha policy thar duang turin a lo ti tawh bawk a ni.

Assam sorkar chuan December 31, 2017 zan khan NRC Draft list hmasa ber a tichhuak a, hetah hian MP leh MLA hlui eng emaw zat hming a lang lo a, chutih laiin ULFA hruaitu Paresh Baruah hming a lang thung a ni. Hemi avang hian sawiselna leh dodalna a nasa hle a ni. Hetih lai hian Union Home Minister Rajnath Singh chuan NRC list hmasaa tel lo pawh, India khua leh tui diktak an nih chuan list tarchhuah a nih leh hunah chuan an tel ngei tawh tur thu a lo sawi tawh a ni.