Assam : April 4-ah BTC inthlan nei dawn

Assam state Elec­tion Commission chuan Bodoland Territorial Council (BTC) inthlan neih hun atan April 4 a ruat. BTC member 40 thlanna neih tura chuh tumte tan March 18 thleng nomination paper thehluh theih a ni. April 4-ah vote thlakin, April 8-ah vote chhiarin result puan nghal a ni ang. BTC hian district pali - Kokrajhar, Baksa, Chirang leh Udalguri a huam a ni.

 

Inthlan neihna tur huam chhungah hian vote nei mi 23,86,359 awmin, mipa nuai 12.9 leh hmeichhia nuai  11.76 an awm. Vote thlakna tur polling station 3,077 siam a ni ang. BTC inthlanah hian Assam-a rorellai, BJP chuan ṭangrual sorkar a siampui, Bodoland People's Front (BPF) thawhpui loin, party mala chuh a tum. BJP leh BPF hi seat insem dan chungchangah an inrem thei lo nia sawi a ni. 

Nilaini khan BJP chuan state president Ranjeet Kumar Dass hoin Goreswar-ah emergency meeting an nei a, BTC inthlana party mala chuh hi an rel ta a ni. Meeting-ah hian BTC huam chhunga party hruaitute bakah, irrigation minister Bhabesh Kalita, Mangaldai MP Dilip Saikia, Golakganj MLA Ashwini Rai Shankar leh Assam BJP general secretary Paulak Gohain te pawh an tel. Kum 2015-a BTC inthlan neihah khan BPF hian hnehna changin, seat 40 zinga seat 20 an la a, BJP hian seat khat chauh a la thung.