Tripura-ah hmarchhak High Mast National Flag hmasa ber

Hmarchhak state zinga a hmasa ber turin ft 100-a sang hnam puanzar, High Mast National Flag (HMNF) chu Nilaini khan Tripura Capital Agartala-ah dah a ni. Tripura Chief Minister Manik Sarkar chuan puanzar chu Ujjayanta Palace hmaah a pawtparh a ni.

Ujjayanta Palace hi lal in ni ṭhin, tuna hmar­chhaka museum lian ber ni ta a ni.

HMNF hi State sorkar hnuaia awm Oil and Natural Gas Corporation (ONGC) leh New Delhi-based Fast Track Engi­neering Company ṭang­kawp ten an dah niin cheng nuai 15.87 an seng.

ONGC thupuangtu chuan HMNF chu India hmarchhaka a hmasa ber atan Agartala-ah dah a nih thu a sawi a, ramchhung hmun hrang hrang 300 velah HMNF hi dah a nih tawh thu a sawi. Tripura-a an dah hi ONGC in panga an dahna a nih tawh thu a sawi bawk.

HMNF Agartala ami hi ft 100-a sawng, ft. 20x30-a lian a siam a ni a, khawpui a chei mawi hle a ni.

Official-te chuan India hmar lama HMNF flag hmun hrang hranga dah a nih theih chhan chu Industrialist Navin Jindal hmalakna vang a ni, an ti.

Flag pole hi Ujjayanta palace rilrua dah reng chunga siam a ni a, he museum hi 1899 leh 1901 inkara Tripura lal Maharaja Radha Kishore Manikya sak a ni.

Kum 1949 aṭang khan India ramin hnuai Tripura a awm hma khan Ujjayanata Palace hi Tripura awmptu Manikya dynasty-te in a ni ṭhin a ni. Tripura sorkar-in 1972-73 khan cheng maktaduai 2.5 in lal chhungkaw kut aṭang khan leiin July, 2011 thleng khan state legislative assembly house atan hman a ni ṭhin a, hemi hnuah hi chuan museum atana hman a ni ta thung a ni.