Nagaland Assembly inthlan hun Sawn a ni dawn lo : Rajnath Singh

Union Home Minister Rajnath Singh chuan Nagaland Assembly Election neih hun tur chu sawn a nih loh tur thu leh, neih tum hun pangaiah kaltlangpui a nih tur thu Ningani khan a sawi.

Home Minister chuan Naga­land-a pawl hrang hangten inthlan hun sawn hi duh hle mah se, inthlan chu a hun pangngaiah neih a ni dawn tih a sawi a, Nilaini-a Nagaland Chief Minister TR Zeliang nen an inkawmnaah pawh he thu hi a hrilh niin official-te chuan an sawi.

Home Minister office chuan twitter-ah,"HM pawhin Naga­land Chief Minister hnenah assembly inthlan hi chu Election Commission thuneihna bik a ni avangin inthlan hi a hun ngaiah neih a ni dawn a ni" tiin a tarlang. Ningani khan Rajnath Singh leh TR Zeliang-te hi Delhi-ah an inkawm a, Naga political issue chinfel dan tur chungchang an sawi dun a ni. He hunah hian Zeliang pawh hian Home Minister hnenah hian buaina chinfelna tura ṭha ni a a hriatte pawh a hrilh a ni. Rajnath Singh pawhin a theih ang anga ṭanpui a inhuam thu a sawi bawk.

HM office chuan twitter-ah Naga pawl hrang hrang nena inbiakna erawh kalpui chhunzawm zel a nih tur thu an ziak. Nagaland-a pressure group hrang hrangte chuan inthlan hun sawn a nih theih nan Prime Minister Narendra MOdi hnenah Pathianni khan memorandum an thehlut a, Naga pawl hrang hrangte hmalakna hi Nagaland Health and Family Welfare Minister Imkong Imchen pawhin a thlawp thu Thawhlehni khan a lo sawi tawh bawk.

Nagaland-a pawl hrang hrangte hian Naga political issue chinfel na tura inbiakna hrang hrang kalpui mek chu inthlanna neih a nih chuan a tih sukukin chinfel a nih loh an hlau a, hemi a nih avang hian buaina chinfel a nih hma hi chuan inthlan hi neih rih loh an duh thu Prime Minister hnenah an thlen a ni.