Sorkarin hmarchhak a ngaihsakna avangin BJP-in hnehna a chang ang : Jitendra Singh

Union Minister Jitendra Singh chuan sorkar laipuiin hmarchhak state-te hmasanna tur a ngaihtuah nasat avangin Tripura leh Meghalaya inthlan neih hunah pawh BJP in hnehna an chan dawn tih Nilaini khan a sawi.

Ministry of Development of North Eastern Region charge changtu Jitendra Singh chuan hmarchhak state-ah BJP kaihhruai NDA sorkar chuan hma a sawn nasat thu a sawi a, kawng hrang hranga hma an lakna a bik takin Forest Act an siamṭhatna, thingkunga zinga mau chhiar telh a nih tawh lohna tur chuan Tripura economy-ah hmasawnna nasa takin a thlen dawn niin a sawi bawk. Forest Act siamṭhat a nih avangin Tripura-a kut hnawthawktute pawisa lakluh a pung dawn ni a sawiin, hemi a nih avang hian Tripura-ah chuan BJP thlawp tu an pung dawn niin a sawi.

Modi sorkar anga hmarchhak lam hawi nasa hi an la awm ngai loh thu sawiin Singh chuan Sikkim-a airport siam tur leh Meghalaya airport tihchangtlun te chu hmarchhak hmasawnna duh vanga hmalakna a nih thu a sawi a ni. Arunachal Pradesh-ah pawh India rama a pahnihna ni chauh turin Film and Television Institute of India din a ni dawn bawk a, hei hian hmarchhak ṭhalaite ten eizawnna kawngah leh media lamah hmasawnna a thlen dawn bawk niin a sawi.