GAIL-in Guwahati thleng Urja Ganga Gas Pipeline zawm dawn

Oil Minister Dharmendra Pradhan chuan Ningani khan sorkar gas company GAIL chuan Urja Ganga natural gas pipeline project chu Guwahati thlen tir an tum thu sawiin, Guwahati aṭanga hmarchhak state dang a pawh leh theih nana hmalak tum a nih thu a tarlang.

GAIL hian gas pipeline hi Uttar Pradesh Jagdishpur aṭanga West Bengal-a Halida thleng a siam mek a, heta ṭang hian Jharkhand-a Bokaro leh Odisha-a Dharma chu 2022-a thlen hman an tum a ni. Hemi atan hian cheng vaibelchhe 12,940 ruahman a ni bawk. Industry body Ficci buatsaih seminar-a thu a sawi naah Pradhan chuan Jagdishpur Haldia leh BokaroDhamra pipeline chu Guwahati thleng siam zawm an tum thu a sawi a ni.

GAIL hian Guwahati thleng pipeline siam a nih theih na tur hian thil awm dan an zirchian tawh thu sawiin cheng vaibelchhe 12,940 project pawh hi pawmpui a nih tawh thu a sawi. GAIL hian hmarchhak state te pipeline in a thlen theihna tur hian Petroleum and Natural Gas Regulatory Board (PNGRB)-te pawh a be tawh niin a sawi bawk.

GAIL, Oil and Natural Gas Corp (ONGC), Oil India Ltd leh Bharat Petroleum Corp Ltd (BPCL)-te chuan hmarchhak state pasarih-a gas pipeline a luh theih nan hian ṭangrual a hmalak an tum thu thudawnna chuan a tarlang bawk.

Pradhan chuan Tripura, Manipur, Silchar leh Arunachal Pradesh-ah gas reserve a awm thu sawiin pipeline a awm loh vanga khawih chet leh lakchhuah a la nih loh thu a sawi.

North-Eastern Gas Grid te chuan hemi chungchang hi an ngaihtuah mek thu leh state sorkar company panga te pawh hemi chungchanga a bika hmalak an inpeih thu a sawi a, pipeline siamna tur hian PNGRB hnenah phalna an dil dawn niin a sawi a ni.