Manipur cabinet-in Covid-19 vanga harsatna tawk : Chhawmdawlna tur scheme siam a pawm

Manipur cabinet chuan Covid-19 hripui lengin an eizawnna kawnga a nghawng, chhungkuate hnena chhawmdawlna pekna tur, Chief Minister COVID-19 Affected Livelihood Support Scheme chu a pawm.

He scheme hi Manipur sorkarin hripui leng vanga eizawnna kawnga harsatna tawk chhungkaw tam takte chhawmdawlna tura a duan niin, scheme kaltlang hian chhawmdawlna dawngtu chhungkaw tin hnenah Rs 5,000 ṭheuh pek an ni ang. Mahse sum hi thawh hniha pek an ni dawn a ni.

State sorkarin he scheme hmanga chhawmdawlna a pek tur hian - street vendor, farmer, daily wage worker, construction site worker, public transport driver, school van driver, shop assistant, artist, weavers, performing artist leh home-based business-te a huam ang. He scheme hi social welfare department hnuaiah kalpui a ni dawn a, chhungkaw khatah mi pakhat zelin an dawng thei ang.

Manipur cabinet chuan Chief Minister Angangi Tengbang (Chief Minister Bal Seva) guidelines a pawm bawk. He scheme hi Covid-19 hri vanga nu leh pa chan, fahrahte chhawmdawlna tur a ni.

State chhunga ṭhalai hna nei lote tan skill development leh entrepreneurship lama kawng kawhhmuhna turin labour and employment department tuaithar a, Business of the Government of Manipur (Allocation) Rules, 2009 siamṭhat pawh cabinet chuan a remti bawk.