Centre team-in Tripura-a hri kai tam zualna hmun tlawh

Sorkar laipuiin hri leng dinhmun enfiah tura a tirh, expert-te chuan Thawhlehni khan Tripura-a hri kai thar tam zualna bial hrang hrang an tlawh kual ṭan.

Central team-ah hian All India Institute of Public Health and Hygiene director Dr RN Sinha leh AIIMS-a department of pulmonologist-a assistant professor Dr Ranganath an awm a ni.

Hri leng thawh hnihna thleng mekah state tam zawk dinhmun chuan ziaawm lam a pan chho tawh a, hetih lai hian tunhnaia hri kai thar tamna state parukah chuan an dinhmunte enfiah turin sorkar laipui chuan expert team-te a tir a ni.

Tripura hi hri kai thar tamna state zingah a la tel a, a bikin South Tripura, North Tripura leh Unakoti district-ah hri kai hian pun lam an la pan zel a ni. Central team pawh hian heng district pathumte hi an tlawh kual dawn a, Tripura-ah hian ni thum an cham ang.

State chhunga Covid-19 hri kai mek hi 3,488 awmin, hripui vangin mi 694 an thi tawh a ni. Hri kai hmuh chhuah hi 67,677 an awm tawh bawk.