Nagaland-in private hospital-a reservation siam titawp

Nagaland sorkar chuan an state chhunga hri kai thar an tlakhniam avangin private hospital-a Covid-19 kaite enkawlna tura khum an neih zat aṭanga 50% dah hrang tura thupek a lo siam tawh chu a titawp.

Kumin May thla tir khan state sorkar chuan hri kai an pun chak avang leh, damdawi-ina dah luh ngai an tam avangin private hospital zawng zawngte chu ward pangngai leh ICU-a khum an neih zat aṭanga 50% chu hri kai bikte puala dah turin a lo hriattir tawh a ni.

Thawhlehni khan state sorkar chuan State Level Covid-19 War Room-ah state chhunga hri leng dinhmun sawihoin, hri kai thar an tlakhniam ṭan avangin sorkar damdawi-in leh Covid Hospital bikahte khum an indaih tawh nia an ngaih thu an sawi. Hei vang hian private hospital-ah hri kai enkawlna tur khum zuah tura thupek siam chu hman chhunzawm a ngai tawh lo niin an sawi.

Nagaland-ah hian Thawhlehni khan hri kai thar 60 an awm belh a, heng mite nen hri kai hmuh chhuah tawh hi mi 23,271 an awm tawh. Mi 489 chu hripui vang hian an thi tawh a, tunah hian hri kai enkawl mek 1,134 an la awm. Active case zingah hian a tam zawk chu harsatna nei lo, asymptomatic an ni.