India-Bangladesh ramria sumdawnna hmun khar

Coronavirus, Covid-19 leng mek laka invenna kawng khat atan India leh Bangladesh ramria sumdawnna, border haat-te chu khar a ni dawn tih official-ten an sawi. Ramria sumdawnna, bazar siam hi Meghalaya leh Tripura-ah pali a awm a ni. 

Tripura health and family welfare department secretary Debashish Basu chuan district magistrate/ collector-te chu border haat hi khar turin a hriattir. Basu chuan, "Sorkar laipuiin hri leng laka invenna atana mipui punkhawmna te siam lo tura min tih angin, heng border market-te hi hun eng emaw chen chu khar an ni ang," a ti. South Tripura District Additional District Magistrate Suresh Das chuan Bangladesh pawhin an ram lama sumdawnna hmunte chu an khar tawh bawk tih a sawi.