Covid-19: Nagaland-in state-level training buatsaih

Nagaland sorkar chuan tunlaia khawvel ram hrang hranga hri leng mek, coronavirus Covid-19 do let dan tur chungchangah Nilaini khan state-level training a buatsaih. 

Training hi health and family welfare department buatsaih a ni a, district-level trainer, armed forces, disaster response force leh department official-te an tel. 

State nodal officer for Integrated Disease Surveillance Programme, Dr. Nyanthung Kikon chuan an state-ah he hri kai an la awm lo tih sawiin, rinhlelh thilah mi panga erawh chu an chenna inah enfiah tura dah hran an ni tih a sawi. 

Kikon chuan mipuite hri leng mek chungchanga inven dan hrilhhriat chu an department mawhphurhna a ni tih sawiin, hemi rual hian thu dik tawk lo thehdarh a ni ṭhin chu pawi a tih thu a sawi. 

State ramria entry point-ah te enfiah hna hi uluk taka kalpui a nih thu sawiin, hemirual hian international border kaltlanga lut turte lo ven chu thil hautak a ni tih a sawi. Mahse theihtawp chhuah mek zel a ni, a ti.