Tripura Assembly aṭangin Congress MLA bantir a ni

Assembly Speaker Ramendra Chandra Debnath chuan Zir­tawpni khan thuchhuah siamin, vawi nga lai Congress Legislator lo ni tawh, nikum December thlaa Bharata Janata Party (BJP) zawm ta, Ratan Lal Nath chu anti-defection law hnuai­ah assem­bly member a nihna aṭanga paihthlak a nih thu a sawi.

Speaker Debnath chuan Ratan Lal Nath hian December 22-a Congress chhuahsana BJP a zawm aṭang khan assembly member a nihna aṭang hian ban tawh tur a ni tih sawiin, a chetddan hi ram danpui (constitution) Schedule 10 (anti-defection law) kalh a nih vangin, a chungah hremna lekkawh a nih thu a sawi. Debnath chuan, state Congress President Birajit Sinaha pawhin thuneitu lam hnenah Nath hian BJP a zawm tih a hriattir tawh thu sawiin, assembly member a nihna aṭanga ban tura a ngenna pawh a siam tawh tih sawiin, Nath hnenah pawh vawihnih a ban chungchanga hearing nei tura a koh tawh thu a sawi bawk. Mahse Ratan hian dam loh chhuanlamin a inlan lo ve ve niin a sawi.

Speaker chuan Ratan chu assembly member a nihna aṭanga ban a nih tak thu sawiin, Trupura history-a assembly member nih lai ban tawk hmasa ber a ni, a ti. Ratan Lal Nath hian December 22 khan Congress hi chhuahsanin BJP General Secretary Ram Madhav, Assam Ministers Hi­manta Biswa Sarma leh Parimal Sukla Baidya bakah, Tripura BJP President Biplab Kumar Deb-te awm laiin BJP a zawm a ni. Kum 71 mi ni tawh Ratan hi 1993 aṭang khan Congress-ah hian dinhmun pawimawh tak tak a lo chelh fo tawh a, Congress hming hian vawi nga lai thlan tlin a lo ni tawh bawk.

Nath-a'n Congress a chhuah­san takah hian Congress hian Tripura Assemnly-ah hian member pahnih chiah an nei ta a, sorkar lai Communist Party of India-Marxist kaihhruai Left Front-te hian member 51-an la nei thung a ni.