DRI-te'n Guwahati-ah rangkachak man
Directorate of Revenue Intelligence (DRI) chuan Ningani khan Guwahati-ah rangkachak kg 15 lai mai an man a, DRI official thuchhuah in a tarlan dan chuan rangkachak hi Myanmar aṭanga a ruka chawkluh niin, a kawltu Manipur mi pahnih an man.
An mi mante hian rangkachak tlang 90 lai mai chu Mynamar aṭang hian a rukin an keng thla a, Bolero motor-ah an phur a ni. An mi mante hi Imphal-a cheng niin, Chongtham Nehru Singh leh Aaron Wangkheirakpam-te an nih thu DRI thuchhuah chuan a tarlang. Guwahati Bamunimaidam area-ah man an ni.
Sorkar kum kal lai mekah hian DRI-te hian rangkachak kg 253 lai mai an man tawh a, an rangkachak man zawng zawng hi cheng vaibelchhe 71 man hu a ni tawh a, Bangladesh, Burma leh Bhutan aṭanga a ruka India rama phurh luh a ni tlangpui a ni.