AP leh Manipur-ah hel man

Security force-te chuan chuan Arunachal Pradesh-a Tirap district-ah hel pawl National Socialist Council of Nagaland - Reformation (NSCN-R) mi pakhat an man tih Defence official-te chuan Zirtawpni khan an sawi. Hmun hrang

Kohima defence thupuangtu Col Chiranjit Konwer chuan Khonsa-ah hel pawl mi leh sa a tawm ru tih intelligence aṭanga thu an dawn thu sawiin, Assam Rifles-te chuan helai hmunah hian beihpui an thlak ta niin a sawi.

An mi man hi Manhua Wangpan niin, an pawl-ah chuan Sergeant Major niin, a kut aṭang hian AK- 47, silai mu, pawikhawina lam kaihhnawih thuziak, opium, brown sugar, pawisa, debit card leh credit card eng emaw zat bakah, document pawh an man tel bawk a ni. An mi man hian Khonsa khuaah hian pawikhawihna tur pawisa lam tura a kal thu a sawi niin official te chuan an tarlang.

Hetih lai hian National Investigation Agency (NIA) chuan Manipur Army Convoy beinaa inhnamhnawih ni ngeia hriat chu Zirtawpni khan an man. An mi man hi firfiak pawla tel, 2015 kuma Manipura-a Army Convoy lambuna mi 18 lai thah an nih ṭuma inhnamhanwih ni ngeia hriat a ni. Amah hi hel pawl - Kanglei Yawol Kanna Lup (KYKL) mi leh sa niin, Naorem Premkanta Singh tia hriat a ni. A kut aṭang hian pistol leh a mu eng emaw zat an man.

NIA leh Manipur police ṭang­kawpten beihpui an thlaknaa an man a nih thu an sawi a, an manna hmun erawh an tarlang lo. Manipur Chandel district-a June 4, 2015-a Army Convoy lambuna mi 18 thah an nih ṭum khan Singh hi a tel ve ngei nia an hriat thu an sawi bawk. Imphal NIA Special court chuan non-bailable arrest warrant a tichhuak nghal a, Singh hi 6th Dogra Battalion lambun an nih ṭuma tel ngei a nih thu an sawi bawk.

Tun hnai khan Manipur Po­lice-te chuan hel pawl People Revolutionary Party of Kangleipak (PREPAK) mi leh san an man bawk a, Mynamar aṭanga India rama a ruk luh tum a ni.

Superintendent of Police (SP) Ibomcha Singh chuan an mi man hi PREPAK pawlah chuan a hotu lam niin, India ramri Dalpati area-a beihpui an thlakna Tengnoupal district-a Moreh khuaah an man tih a sawi. An mi man hi an pawlah chuan 2nd Lieutenanr niin, Thamangjam Imocha a nih thu police official-te chuan an sawi a, Imphal West District-a Mayang Langjing thingtlang khaw mi niin, Bangladesh-ah training a nei niin SP chuan a sawi bawk.