Khandu-a'n rel service ngai pawimawh turin union minister ngen
Arunachal Pradesh Chief Minister Pema Khandu chuan Union Finance Minister Arun Jaitley leh Union Railway Minister Piyush Goyal-te chu Union General Budget 2018-19 buatsaih a nih hunah rel hmanga Arunachal Pradesh kalpawhna lam ngaipawimawh turin a ngen.
Pema Khandu chuan a hran ve ve a lehkha thawnin Union Minister-te hnenah hian an state-a rel leh kawngpui lam an ngaihpawimawh vangin lawmthu a hrilh a, Naharlagun Railway Station-ah pawh rel thar service tir a nih theihna turin mamawh hrang hrang a kim vek tawh thu a sawi. Rajdhani Express thleng pawhin service tir theih a nih thu a sawi bawk.
Khandu chuan passenger an pun zel avangin leh passenger-te'n State hrang hrang kalpawh an duh thu a sawi a, hemi a nih avang hian Union General Budget 2018-19 siam a nih hunah Arunachal rel service ngai pawimawh turin a ngen a ni. CM chuan Naharlagun - New Delhi service tur Rajdhani Express, Naharlagun-Guwahati inkara ni inchhawka servie ṭhin Shatabdi Express chu nitina service, Naharlagun-New Delhi Super Fast Express kar khata vawikhat tlan chu nitin service-a 'Arunachal Express' ti a thlak, Chennai, Bengaluru leh Kolkata service tur rel leh bungraw phur rel te service tir dan tur ngaihtuah turin Union Minister-te hnenah ngenna a thlen a ni.