Mamata-i'n Assam-a Bengali-te a tiralmuang lo : BJP MLA

Bharata Janata Party (BJP) Legislator Shilanditya Dev chuan West Bengal Chief Mi­nister Mamata Banerjee-i chu Assam-a cheng Assamese leh Bengali te inkarah ṭan chhan mumal nei lo a, National Register of Citizens (NRC) hmanga hem thlak tumah a puh.

MLA Dev chuan Ma­mata hian Assamese leh Bengali-te inkarah inrem lohna thlen a tum mai bakah, Bangladesh aṭanga inhumhimna zawnga lo kalte laka a rilru puthmang pholang leh, Citizenship (Amendment) Bill, 2016 kalh zawnga thu sawiah a puh a ni.

Hojai assembly con­stituency-a MLA ni mek Shiladitya Dev chuan West Bengal-ah BJP-in hma an sawn zel avanga khatiang thil kha sawi chhuakah a puh bawk a, NRC hmanga an party dinhmun tihngheh tumah a puhlet bawk. Mamata-i thiltum chu thil hlauhawm tak niin, politics thil avanaga Assam-a cheng Assamese-te leh Bengali-te inkara hem a thlak avangin, a thil tih hi thil hlauh­awm tak a ni, a ti bawk.

Mamata Banerjee-i hian tun hnai lawka Ali­purduar-a thu a sawi­naah NRC chu nasa taka sawiselin, BJP-te'n Assam aṭanga Bengali-te hnawhchhuahna hmanruaah an hmang niin a sawi a, hei hian sawi zui pawh a hlawh hle a ni. Eptu pawl lian ber Congress pawhin Mamata-i hi an lo khak tawh a, Home Minister Rajnath Singh pawhin a lo chhanglet tawh bawk.

Assam sorkar hian Supreme Court thupek angin kum kalta December 31 khan NRC draft list hmasa ber a tichhuak a, hetah hian mi vaibelchhe 1.9 hming a awm a, he list a telh tura application thehlut zawng zawng hi mi vaibelchhe 3.29 an tling a ni. Draft list hmasa berah hian MLA hlui leh MP ni lai hming eng emaw zat a tel loh avangin mi tam tak chuan an sawisel nasa hle a, Rajnath Singh chuan India khua leh tui diktakte chu telh an la nih vek dawn thu a sawi thung.