Manipur : MPSC exam fel hlel tih forensic test aṭangin lang

Manipur Civil Service Combined Competitive (MCSCC) Examination result 2016 a tihchhuahah exam beitu ṭhenkhat ten thil dik tawk lo a awm nia an hriat avanga sorkar hnenah chhuichiang tura an phut hnuah, Kolkata-a forensic test result aṭanga a lan danin thil fel tawk lo a awm niin a lang.

Manipur Public Service Commission (MPSC) exam chungchang chhuichian a nih theihna atana hmalatu pakhat Arbind Salam chuan, examiner ni lo midang signature ni ngeia rinhleh a awm avangin exam beitute hian chhuichian an phut thu a sawi. Hemi avang hian answer scipt panga chu 'Truth Labs: Forensic Services Kolkata'-ah December 1 khan an thawn thu a sawi bawk.

Forensic test result hi January 8 khan a lo chhuah thu sawiin Salam chuan an answer script thawn zinga pathum chu an kutziak a inan thu sawiin a dang pahnih erawh mihran kutziak a nih leh nih loh an chian theih loh thu a sawi. A test tu te pawhin court lamin dan anga hmalak an huam a nih phawt chuan an thil hmuchhuah chu nemngheh an inhuam thu a sawi bawk a ni.

Arbind Salam chuan an state a competive exam dahsan ber civil service exam chu rin ngam a nih tawh loh thu a sawi a, exam petu tam tak chuan induhsakna thil a awm ni a an hriat thu a sawi bawk.

Exam petu mi 275-te chuan RTI hmanga an exam chhana en let leh an dil naah examiner signature a inan loh nuaih thu a sawi a, heti a nih lai hian Manipur public service hi mi pakhat chauhin an evaluate bawk si avangin rinhleh a hlawh tak thu a sawi. Salam chuan paper endik tur tam zawk pawh thawn an duh viau a, mahse paper pakhat endik man hi cheng 5000 lai anih avangin a harsat thu a sawi.

Arbin Salam chuan Manipur sorkar chu exam petu te harsatna tawh chu hriatthiampui turin a ngen a, examiner ni lo midang an inhnamhnawih nachhan sawifiah turin a ngen bawk a ni.