Assam sorkarin best employee award siam dawn

Assam cabinet chuan sorkar inrelbawlna ṭha zawk kalpuina tur leh self-help group-te puihna tur thutlukna hrang hrang a siam, heng zingah hian state leh national anthem play-na tur te, sorkar programme-a traditional food siam leh best employee award siamna turte pawh a tel.

Chief minister Himanta Biswa Sarma chuan Nilainia cabinet ṭhutkhawmah thutlukna pawimawh tak tak hi siam a nih thu a sawi. State sorkarin district hrang hrang dinhmunte enpui tur hian 'guardian minister' leh 'guardian secretary' a lo ruat tawhte chu tunhnaia hri kai thar tam zualna, complete lockdown puanna district pasarih-te dinhmun enfiaha tlawh turin cabinet chuan a ti bawk a ni.

State cabinet chuan state anthem, “O Mur Apunar Dekh” (O my homeland) tih chu sorkar programme leh meeting ṭan tirah play vek tur leh, meeting tawpah national anthem, “Jana Gana Mana” play ziah turin an rel bawk.

Meeting-ah hian local self-help group-te thuam chakna tur kawng khat atan tualchhunga siam chhuah, traditio­nal towel, 'gamosas' chu sorkar programme-a telte hnenah pek vek zel an rel bawk a ni. Assam traditional culture-ah chuan 'gamosas' hi mikhualte inlawmnaa atan an inpe ṭhin a ni.

Assam chief minister hmasa ber, Lokapriya Gopinath Bordoloi thih cham, August 5 chu kumtinin ‘Karmachari Divas’-a hman rel a ni bawk. Hemi niah hian state sorkar hnathawk, district level-ah non-gazetted zinga panga leh state level-ah mi 10-te hnenah hnathawh ṭhat lawmman hlan ṭhin an ni dawn a, heng chawi­mawina dawngtute hi an service kum khatin pawh­sei sak zel an ni ang.