Union home secretary hoin hmarchhaka Covid-19 dinhmun sawi ho
Union home secretary Ajay Bhalla chuan Nilaini khan hmarchhak state hrangte leh Union Territory aiawhte nen Covid-19 hri leng dinhmunte an sawi ho.
Hmarchhak bialah hian hri leng dinhmun hi a la ṭha lo hle a, kar liam ta chhung khan district 73 zingah district 45-ah hri kai hmuh chhuah thar, positivity rate hi 10% chuang an la ni.
Home ministry chuan meeting-ah hian active case awm zat te, Case Fatality Rate (CFR), Case Positivity Rate (CPR) leh vaccination status chungchangte an sawiho tir a tarlang. Positivity rate 10% aia tam awmna hmunah hri darh zel tur venna atana khuahkhirhna khauh tak siam a ṭul thute pawh an sawiho bawk.
Ajay Bhalla chuan home ministry-in June 29-a kaihhruaihna a tihchhuah angin, five-fold strategy - Test-Track-Treat-Vaccinate leh COVID appropriate behaviour zawm ṭhat a ṭul thu a sawi.
Hmarchhak state leh UT-te chu district leh khawpuite chu uluk taka thlithlai reng tur leh, hri kai an pun chhoh chuan a ṭul anga hma la thuai tura hrilh an ni. Positivity rate a san chhoh dan azira khuahkhirhna pawh siam a tul dante pawh sawiho a ni bawk.
Home secretary hoa meeting-ah hian hmarchhak state leh UT-a chief secretary, director general of police leh principal secretary (Health)-te an tel. Niti Aayog member (health), NCDC director, MHA leh ministry of health and family welfare-a senior officer-te an tel.