Nagaland-ah Congress party-in fuel man sang duh lohna lantir

Nagaland Pradesh Congress Committee (NPCC) chuan Congress party-in ram pum huapa fuel leh thil dang man sang zel duh lohna an lantir chu Nilaini khan an state-ah an lo zawm ve.

NPCC working presi­dent Khriedi Theunuo chuan nitin khawsakna atana mamawh thil man sang zel chu mipui nawlpuiin an tuar nasa tih sawiin, hri lengin ei leh bar zawnna kawnga harsatna a thlen mek laiin, thil man sang zel chuan mi tam tak tan phurrit a thlen a ni, an ti.

Thil man sang zel duh lohna lantirna, ni 10 chhung neih an tum chu mipui nawlpuite hmakhua an ngaih vanga buatsaih a nih thu Theunuo chuan a sawi a, sorkar chu mipuite dinhmun chawikanna ngaihtuahtu tur a nih laiin, an harsatna tawk mekte chu a ngaihthah sak zawk a ni, tiin a sawi.

Nagaland-a district tinah chuan diesel leh petrol manin san lam a pan zel a, petrol litre khat chu Rs 100 a kai vek tawh niin NPCC hruaitu chuan a sawi. Petroleum products man san chhanah state sorkar pawhin mawhphurhna a nei tih sawiin, chhiah a lak chu a sang hle a ni, a ti.

Kohima District Congress Committee president Kevi Vizo chuan Congress volunteer-te chuan Kohima khawpuia petrol pump leh hmun pawimawh hrang hrangah poster leh banner-te an tar dawn tih a sawi bawk.