Hmarchhak chief minister-te'n Guwahati-ah meeting an nei

Hmarchhak state hrang hranga chief minister-te chuan Thawhṭanni khan Guwahati-ah conference neiin, BharatNet kalpui dan tur leh telecom project dang kalpui dan tur an sawiho.

An project sawiho hian a tum ber chu mipui nawlpui, zirna-in leh hmun kilkhawr zawka chengten an phak ang tawk leh an tlin ang tawka broadband service an neih theihna tur a ni. He mi tihlawhtling tura mimal, company leh sorkar hmalakna leh thawhhonna tur kawng hrang hrangte sawiho a, ngaihtuah ho a ni. Minister of State for Ministry of Communications Manoj Sinha chuan he hun hi khuallian niin a hmanpuiin a, India rama Gram Panchayat satelite nena thlunzawm hmasak ber, Meghalaya ami chu vantlang hmantheih turin a tlangzarh nghal a ni. Hemi bakah hian Manipur-a Gram Panchayat-a Bharatnet project hnuia Wifi 100 dah chu tlangzarhna a nei bawk.

He conference-ah hian Aru­nachal Chief Minister Pema Khandu, Assam Sorkara Science and Technology Cabinet Minister Keshab Mahanta, hmarchhak state chief secretary, Department of Telecom Ministry Senior officer-te bakah, Bharat Broadband Network Limited (BBNL) leh Bharat Sanchar Nigam Limited (BSNL) aiawhte pawh an tel a ni. Manoj Sinha chuan Prime Minister Digital India kalpuina hnuaiah BharatNet chu hmun kilkhawr zawka chengten an hman theih tur khawvela broadband project lian ber a nih thu a sawi.