Communication tih chak nan Vaibelchhe 10, 743 ruahman

BharatNet Confere­nce khuallian Union Minister of State for Te­lecommunication Jayant Sinha chuan sorkar laipuiin hmarchhaka tele­communication network tihhmasawnna tur atan cheng vaibelchhe 10,743 a ruahman thu a sawi. Guwahati-a BharatNet kalpui dan tur leh telecom project dang chungchang ennawnnaah hian, Sinha chuan hmarchhah hmun hrang hranga mobile network tihchuangtlun leh thingtlang khaw kilkhawr berah pawh mumal taka hman a nih theihna turin sorkarlaipuiin ruahmanna an siam thu a sawi uar hle. He project hi December 2018-ah chuan zawh hman beisei a nih thu a sawi bawk.

Minister chuan Bha­ratNet chak zawk leh ṭha taka hmarchhaka kalpui tura thutlukna Telecom Commission-in tun hnaia meeting an neihah a pawmpui thu a sawi bawk a, he hmalakna hnuaiah hian gram panchayat 4,420-te chu satellite hmanga thunzawm tuma ni, a ti. Kumin december-ah chuan he project hi zawh hman tum a nih thu sawiin, satellite hmanna tur atan hian cheng vaibelchhe 733 ruahman a ni, a ti.

Hmarchhak hma­sawnna tur project-ah hian thingtlang khaw 8,621-ah tower 6,673 dah tum a nih thu a sawi a, national Highway dungah pawh dahtuma hmalak a nih tur thu leh, cheng vaibelchhe 5, 336 ruahmanna a nih thu a sawi.

Sinha chuan BSNL leh USO-te pawhin Arunachal Pradesh leh Assam-a district pahnih - Karbi Anglong leh Dima Hasao-ahte mobile tower 2, 817 dah a nih na turin MoU an ziah tawh thu a sawi. December 2017 aṭang tawh khan state dang paruk-ah pawh Airtel chuan tower 2, 004 dah turin hmalakna a ṭan tawh thu a sawi bawk a, thla 18 chhunga zawh hman a nih tur thu a sawi bawk. Minister hian BSNL ten an kalpui Asthamangal project tlangzarhna hun a nei bawk a ni.

He project hnuaiah hian cheng vaibelchhe 35 vel sengin 810 Gbps alternate bandwidth BSNL chuan hmarchhak state headquartes-te thlunzawm tur a buaipui mek a, Power Grid Corporation of India (PGCIL) hnen ami optical power ground fibre (OPGW) an hmang a ni.