Tripura, Meghalaya leh Nagaland inthlan hun a chiang ta

Election Commission of India (ECI) chuan hmarchhak state pathum - Tripura, Meghalaya leh Nagaland inthlan hun tur chu nimin khan a puangchhuak ta a, thla leh hian heng state pathumte hian inthlan hi an hmachhawn dawn a ni.

Tripura
Tripura-ah chuan February 18 hian inthlan hi neih a ni dawn a, he tih lai hian Meghlaya leh Nagaland-ahte chuan February 27-ah neih a ni dawn thung. Heng state pathumah hian inthlan tur boruak hi a sosang tawh hle a, ECI lam pawhin inthlang tura an inpeih leh peih lo an enfel tawh hlawm a ni.

Tripura-ah hian BJP lamin ṭan an khawh nasa hle a, hnehna chan ngei tumin hma an la a, venhimna a ṭhat tawk loh thu leh thil fel hlel a tam thu sawiin, ECI hnenah pawh venhimna kalpui turin an lo nawr fo tawh a ni. ECI lam pawhin February thlatirah venhimna kalpui tur paramilitary force hrang hrang thawnluh an nih dawn thu a lo sawi tawh bawk. Tripura Assembly term ding lai hi March 14 khian a tawp ang.

Meghalaya
Meghalaya-ah chuan rorel lai Congress party kaihhruai sorkar-a MLA eng emaw zat chu nikum lam aṭang tawh khan an bang nasa hle a, hei hian congress party chhungah nghawng nasa tak a neih rin a ni. Chief Minister ni lai Mukul Sangma erawh chuan nghawng a nei dawn lo niin a sawi thung. Hetih lai hian Prime Minister Narendra Modi leh BJP National president Amit Shah-te chuan Meghalaya-ah hian BJP tan an lo campaign tawh bawk. Meghalaya Assembly term dinglai mek hi March 6 khian a tawp tawh dawn a ni.

Nagaland
Nagaland-a pawl hrang hrang leh pressure group hrang hrangten inthlan hun tikhawtlai turin leh ṭhulh rih turin nasa takin sorkar laipui ngen mah se, Nagaland state inthlanpui hi February 27 hian neih a ni dawn ta tho a ni. Union Home Minister Rajnath Singh pawhin inthlan neih tum chu kaltlangpui a nih dawn thu leh an thuneihna ni loin, ECI thuneihna hnuaia awm a nih thu leh inrawlh an tum loh thu a lo sawi tawh. NSCN-IM leh sorkar laipuiten Naga Political issue kum 70 zet chinfel loha awm chingfel tura an inbiak mekna chu inthlan hian a tihbuai an hlauh avangin pawl hrang hrang chuan inthlan hi ṭhulh hrih turin Prime Minister hnenah ngenna an thehlut tawh a, sorkar laipui leh NSCN-IM te hian 2015 August thla daih tawh khan Framework Agreement an lo ziak tawh a ni. Nagaland Assembly term hi March 14 khian a ve dawn bawk.

Heng state pathumah hian assem­bly seat 60 ṭheuh a awm a, election result hi a ruala puan a ni ang. ECI chuan March 3-ah vote hi chhiar a nih tur thu tarlangin, hemi ni vek hian result puan nghal a ni ang.