Assam CM leh Rajnath Singh inkawm

Assam Chief Minister Sarbanada Sonowal leh Union Home Minister Rajnath Singh-te chuan Thawhlehni khan inkawmna hun neiin, Indo-Bangla border hung zawh dan tur chungchang bakah, national Register of Citizens (NRC) draft list hmasa ber tihchhuah chungchang an sawi dun.

Chief Minister leh Rajnath hian Assam chhunga India leh Bangladesh inrina la hung zawh loh leh hung loh lai la awm zeuh zeuh chu an ngaihmawh thu sawiin, kumin chhung ngeia hung zawh vek a nih theih nana hmalak a ṭul thu an sawi.

Inkawmna hi New Delhi-a Union Home Minister official Residence-ah an nei a, Sonowal chuan an state chhunga hnam hrang hrangten sorkar laipui aṭanga puihna an dawn ṭhin avangin lawmthu a sawi bawk.

State sorkar leh sorkar laipui chuan NRC list tihchhuah leh hunah pawh ṭanrual a pawimawh thu an sawi a, India-Bhutan border kawngpui tihhmasawn dan tur leh heng lai vela infrastructure tih changtlun dan turte an sawi dun bawk a ni. Rajnath Singh nen inkawmna an neih hma hian Sonowal hian Union Finance Minister Arun Jaitley a kawm a, Arun Jaitley hian Assam-a February 3 leh 4-a "Global Investors' Summit" neih tura sate sorkar hmalakna chu lawmawm a tih thu a sawi.