Manipur-ah Saksham-2018 hawng

Pertroleum product renchem leh ṭangkai zawka hman dan tur campaign, thla khat awh tur 'Saksham-2018' chu Thawhlehni khan Manipur khawpui Imphal-ah hawnna hun hman a ni. He campaign hi Ministry of Petroleum & Natural Gas hmalakna hnuaia Manipur Public Sector Oil & Gas Company leh Petroleum Conservation Research Association (PCRA)ṭang­kawpten an buatsaih a ni.

He hunah hian Manipur Governor Dr. Najma Heptulla chuan thildang a thlakna tur zawnga pertroleum product renchem a ṭul tawh zia a sawi. Petrol chu nitin mamawh a nih tawh thu sawiin, boruak tichhetu pawh a ni tel niin a sawi a, ramdang aṭanga petroleum product tam tak chawk luh a nih avangin ram economy pawh thui takin a nghawng niin a sawi bawk.

Thu a sawi bakah Heptulla-i hian hemi puala 'Walk Rally', school hrang hrang zirlaiten an neih chu vailiamna hun a hmang bawk. Thu a sawi zawh hian Petroleum & Natural Gas Minister Dharmendra Pradhan thuchah chhiarchhuahna hun a hmang nghal a ni.

Union Minister thuchahah hian India chu khawvela oil hmang tam ber ram pathumna a nih thu sawiin, "Khawvela economy ṭhang duang ber pawl kan nih bawk avangin energy, a bik takin oil leh gasa mamawhna hi a pung nasa em em a ni" a ti. Hemi a nih avang hian oil leh gas renchem a ṭul thu leh a pawimawh zia pawh a sawi a, pertroleum product hman tlem chuan boruak thianghlim kawngah te, sik leh saah leh sustainabel development tihmasawnna thlengin a nghawng dawn a ni, a ti bawk.

Saksham-2018 campaign kharna hun hi February 15-ah neih leh a ni ang.