EC thupek angin Tripura-a police officer 151 transfer

Election Commission of India (ECI) thupek angin Tripura-a police officer 151-te chu transfer an ni a, heng zingah hian officer-in-charge (OC) 20 lai an tel tih Nilainia police official thuchhuah chuan a tarlang.

Director General of Police Akhil Kumar Sukhla chuan officer 151, OC 20 telin Tripura hmun hrang hrangah transfer an nih thu a sawi a, hei hi ECI thupek anga ti an nih thu a sawi. Tripura hian February 18 hian Assembly inthlan an nei dawn a, hemi denchhan hian Election Commission chuan police thuneitute hnenah police officer an home district-a awm te leh an awmna ngaia kum thum leh a aia tam awm tawhte chu transfer turin thupek a lo chhuah tawh a ni. Hei hi inthlanna felfai leh ralmuang tak neih a nih theihna tura tih a ni.

BJP lam chuan vawi tamtak Tripura chu inthlanna nei turin a ralmuang tawk lo niin an lo sawi tawh a, EC hnenah pawh endik turin vawi eng emaw zat an lo ngen tawh bawk. BJP hian hnehna chan ngei tumin hma an la nasa hle a ni. Tripura inthlanna neih tura inbuatsaihna kalpui dan endik tur hian nimin khan Deputy Election Commissioner Sudeep Jain pawhin Agartala a thleng tawh nghe nghe.

Tripura hi Kerala tih lohah chuan India rama Communist Party of India- Marxist (CPI-M)-te'n ro an relna awmchhun a ni a, tun Assembly term ding lai mek hi March 14 hian a tawp tawh dawn bawk.

Tripura bakah hian Megha­laya leh Nagaland-te pawhin February 27 hian inthlan an nei ve dawn bawk a, heng state pathum te hi Chief Election Commissioner (CEC) A.K. Joti kaihhruai EC Team-te chuan inthlan an neih tura an inbuatsaihna an lo endik vek tawh a, thurawnte pawh an lo pe tawh a ni.

Tripura, Meghalaya leh Na­galand-te hian Assembly member seat 60 ṭheuh an nei a, vote chhiarna hi March 3-ah a rualin an nei dawn a ni.