Nagaland MP Neiphiu Rio-a'n NDPP zawm

Nagaland Lok Sabha member Neiphiu Rio chuan Nilaini khan Naga People's Front (NPF) chhuahsanin, Party thar Nagaland Democratic People’s Party (NDPP) a zawm.

Vawi thum lai Chief Minster pawh lo ni tawh Neiphiu hian a banna lehkha hi NPF hruaitu Shurhozelie Lieziestsu hnenah a thehlut a, a ban chhan erawh a sawi lo. NPF party hruaitu zinga mi Neiphiu Rio hian 2002 khan Congress a chhuahsan a, NPF hi an din a ni. Nagaland-in Lok Sabha member an neih chhun a ni bawk. Rio chuan NDPP-in an sawm thu leh lawm taka an sawmna a pawm thu a sawi a, political party thar a zawm daih hian sawi zui a hlawh hle. Ṭhenkhat chuan NPF party chhunga thuneihna inchuhna a awm avanga chhuahsan niin an ngai.

Member 60 awmna Nagaland Assembly term hi March 13 hian a tawp tawh dawn a, Nilaini khan Election Commission pawhin Nagaland hi February 27-ah an inthlan dawn thu an tihchiang tawh bawk.

NDPP hruaitu Ching­wang Konyak leh Ale­mtemshi Jamir-te nen an inkawmnaah Rio chuan, NDPP chu Naga society-a a ṭha lama danglamna thlentu tur an nih thu a sawi a, mipuite pawhin an hmuhtlang vek tura rorelna, hmasawnna nasa tak thlen leh eirukna do chu a hmatlir a nih thu a sawi a ni.