Assam House-ah bawng humhalhna bill pharh dawn
Assam cabinet chuan assembly budget session neih hunah bawng humhalhna bill pharh a remti.
Minister leh sorkar thupuangtu Pijush Hazarika chuan Nilainia cabinet meeting-ah bawng humhalhna tur bill siam chungchang hi ngaihtuahin, July 12 aṭanga assembly budget session neih turah bill pharh hi an pawm tih a sawi.
Chief miniser Himanta Biswa Sarma hoa cabinet meeting-ah hian dan hman lai, “The Assam Cattle Preservation Act, 1950” chu ṭhiah a, dan thar “The Assam Cattle Preservation Bill, 2021” siam chu session neih turah pharh an rel a ni.
May 22-a 15th Assam Legislative Assembly session hawnna inkhawma thu a sawiah, governor Jagdish Mukhi chuan bawng humhalhna bill chungchang hi a lo sawichhuak tawh a, "He bill-ah hian state pawn lama bawng hralh khapna siam tel niin, dan bawhchhiate ngaihnathiam an ni lo ang," a ti.
Cabinet meeting-ah hian kum 2003 hmalam aṭanga tribal district - Kokrajhar, Chirang, Baksa, leh Udalguri-a cheng Gorkha hnamte chu 'protected class' zingah tel an remti bawk. Hei bakakh hian Sadiya tribal belt-a cheng nghet Moran, Matak, Ahom, Chutia leh Gorkar hnamte pawh 'protected classes of persons' list-ah telh an remti bawk a ni.
Assam CM-in democracy dinhmun a tiderthawng : Akhil Gogoi
Sivasagar MLA leh Raijor Dal hotu Akhil Gogoi chuan Assam chief minister Himanta Biswa Sarma chu Assam democracy dinhmun hlauhawm taka dahah a puh.
Akhil Gogoi chuan CM-in tunhnaia MLA-te chu dan siamtu ringawt niin, minister-te chu dan kengkawhte anni tih a sawi chungchang a chhan letnaah he thu hi a sawi a ni. Sarma chuan MLA-te chuan deputy commissioner leh superintendent-te chu thu an pe tur a ni lo a, district official-te hian amah leh minister-te thupek chauh an ngaihchang tur a ni tiin a sawi.
Gogoi chuan CM chu Indian Constitution-a MLA-te nihna leh mawhphurhna tarlannate chu ennawn leh turin a ti a, MLA-te chuan legislative, financial, executive leh electoral-ah thuneihna an nei ve vek tih sawiin, dan kalhin CM chuan MLA-te thuneihna leh mawhphurhna chu tihnep sak a tum a ni,a ti. Hei hi Supreme Court rorelna palzutna leh sorkar inkaihhruaina dan a ni lo tih a sawi bawk.