Shillong-ah Father Stan Swamy hriatrengna buatsaih

Meghalaya khawpui, Shillong-a Cathedral Calvary-ah nimin chawhnu khan Thawh­ṭannia thi ta, Father Stan Louruswamy pualin memorial service leh candle light program buatsaih a ni.

Jesuit priest leh tribal rights activist, kum 84 mi Father Stan Swamy hi kum 2018-a Bhima Koregoan-a tharum thawhna thlenga inhnamhnawih leh Communist Party of India (Maoist) nena inzawmna neia puhin National Investigation Agency chuan Unlawful Activities (Prevention) Act hnuaiah thubuai siamsakin nikum khan an man a ni. Taloja Central Jail-ah dah a ni a, bail a dilnate chu court-in a lo hnawlsak tawh hlawm a ni. A hriselna tlahniam zel avangin May 29 khan Mumbai-a private hospital-ah dah a ni. NIA custody-a awm laiin, Thawhṭanni khan a thi a, Thawhlehni khan vui liam a ni.

Father Swamy thihna thleng chungchangah hian pawl hrang hrang, a bikin Kristian pawlte aṭangin sorkar laipui demna a nasa hle a, kum upa tak leh hrisel lo tak chunga bail a dilna tihkhawtlai sak a nih zel avangin judiciary lam pawhin dem an hlawh hle.

Maharashtra prison department chuan Father Stan Swamy thih dan chungchang chhui chiang turin magisterial inquiry neih a ni dawn tih a puang tawh bawk. Hetih lai hian Ministry of External Affairs chuan Father Swamy hian damdawi-inah enkawlna ṭha tak dawngin, a hriselna dinhmun pawh court-in a thlithlai reng a ni, a ti thung.