Union Power Secretary-in AP Chief Minister thlawpna a ngen

Union Power Secre­tary Ajay Bhalla leh Power Ministry senior officer-te chuan Nilaini kalta khan Arunachal Pradesh Chief Minister Pema Khandu chu New Delhi-a an office-ah kawmin, Rural Electrification Program kalpui mek thlawp turin an ngen.

Ajay Bhalla chuan Pema Khandu thlawpna an mamawh thu sawiin, Deen Dayal Upadhyaya Gramjyoti Yojana hnuaiah rural electrification prog­ram chak taka kalpui an tum thu a sawi. Electric hrui hmanga power pek tur thingtlang khaw 319 zingah 204-ah chuan electric an pek tawh thu a sawi a, khaw 115-ah pek a la ngaih thu a sawi. Heng bakah hian thingtlang khaw 901-te chu electric hrui hmang lo a ni zung chakna hmanga electric pek an tum thu a sawi bawk.

Chief Minister Khan­du pawhin an state chhunga eng pekna tur kal­pui mek chu power de­partment kutah February, 2018 hi chuan zo hman tura a ngen tawh thu a sawi a, ram chhunga in zawng zawngin eletric an hman chu Prime Minister Narendra Modi duhdan pawh a ni, tiin a sawi a ni.

Khandu pawhin Power ministry-in an ngenna chu a pawm thu sawiin, a theih ang anga hmalak a tum thu a sawi ve bawk.

Power Secretary chuan Khandu hnenah sorkar laipuiin Khumpi - Tawang, Bomdilla - Kalaktang leh hmundang ṭhenkhatah 132 kn trans­mission project kalpui a tum thu a hrilh bawk.

Ajay Bhalla chuan Arunachal-a Kameng (600MW) Hydro elec­tric power project leh Pare(110 MW) hydro elec­tric project kalpui meka an hmalkna avangin Chief Minister chu a fak bawk a, heng project kalpui mek hi March 2018 hian zawh hman beisei niin, PM Modi-a'n a hawng dawn a ni.