Tripura : CPI-M leh BJP inkara buaina chhuakah mi panga hliam

Assembly election hun tur Election Commission of India (ECI) in a puanchhuah tuk lawk Zirtawpni khan Tripura-a Dhalai District-ah chuan Communist Party of India -Marxist (CPI-M) leh Bharata Janata Party (BJP)-te an innawr buai a, mi panga-in hliam an tuar.

Hliam tuarte hi damdawi-ina hruai an nih hnu lawkah, dam­dawi-in kawtah hian party pahnih mi leh sate hi an intibuai chhunzawm leh a, police-te'n tear gas hmangin an hnawtdarh a ni.

Buaina hi Zirtawpni chhun dar 12 vela chhuak niin, CPI-M-te hian BJP supporter Baligaon Area-a kawngzawh an tikhaihlak niin police-te chuan an sawi a, CPI-M lam hian a hma zana BJP thlawptuten an party flag an paih sak vanga he tianga che an nih thu an sawi thung. BJP activist-te hian CPI-M-te hian Ningani zan vek hian an party bungrua tichhia-a an puh avangin kawng an zawh ve thung. Heng party pahnih lungawi lote hi intawngin an intibuai ta chiam a, tiang hmanga an invuaknaah CPI-M mi pathum leh BJP mi pa­hnih­in hliam an tawrh phah ta a ni.

Dhalai district Additional SP Kulwant Sinha chuan hliam tuarte hi kamalpur sub-divisional hospita-ah dah luh an nih thu a sawi a, damdawiin kawtah hian party pahnih mi leh sate hi an pungkhawm leh niin a sawi bawk. Heng pungkawm-te hi hnawhdarh nan leh boruak sosang zel thunun nan tear gas an hmang niin a sawi bawk a, paramilitary force-te pawh kohluh an nih thu thu a sawi bawk.

ECI chuan Ningani kalta khan Tripura Assembly inthlan hun tur hi an puang a, February 18 hian inthlan an nei dawn a, March 3-ah vote chhiar a ni ang.