Covid-19 : Hmarchhak dinhmun

Arunachal Pradesh-ah Thawhlehni khan Covid-19 kai mi panga hmuh chhuah thar a ni a, anni nen hian hri kai hmuh tawh hi mi 27 an tling. 

Chief minister Pema Khandu chuan hri kai hmuh tharte hi taksaa natna lang lo, asymptomatic vek an ni tih a sawi. Quarantine centre-a awm lai vek an ni a, hri kai tih hriat a nih hnuah Covid Care Centre-ah sawn nghal an ni, a ti. 

Arunachal Pradesh-a hri kai hmuh tawh mi 27 zingah mi pakhat chu enkawl dam ni tawhin, damdawiin aṭangin chhuahtir a ni tawh. 

Assam-ah hri kai an pung chak hle a, nimin thleng khan hri kai hmuh chhuah tawh hi mi 1,561 an tling tawh. 

Health minister Himanta Biswa Sarma chuan hri kai zinga 1,222 chu enkawl mek an nih thu leh, 337 chu enkawl dam an nih hnuah damdawiin aṭanga chhuah tir an nih tawh thu a sawi. 

Assam-a hri kai hmuh thar zingah thlawhtheihna hmanga haw mi panga bakah, Sualkuchi block PHC in charge, Dr Dipak Chandra Das pawh a tel. Official-te chuan Dr Das hi asymptomatic a nih thu sawiin, tih dan phung anga health worker zawng zawngte test an neih sak hnuah hri hi a kai tih hmuh a ni tih an sawi. Doctor  contact tracing pawh neih nghal niin, an sample-te pawh lak sak nghal vek an ni bawk. 

Health department chuan Barak Valley leh Hojai ah tangkhang hruai hawtu rel pathum a la thleng leh dawn tih sawiin, hri kai pawh hi an la pun belh zel a rinawm thu an sawi.

  

Hri kai an pun belh zel avangin state sorkarin Covid-19 test-na atana Tezpur-a Defence Research Laboratory hman a dilna chu DRDO chuan a pawmsak tawh bawk.

 

Manipur-ah Thawhṭannia hri kai hmuh thar mi pahnihte nen, an state-a Covid-19 kai hmuh tawh hi mi 85 an ni tawh a ni. 

State sorkar chuan hri kai 85 zinga 74 chu enkawl mek an ni tih a sawi. An vai hian dinhmun ngaihtuahawm an awm lo tih a sawi bawk. 

Manipur-a hri kai enkawl dam tawh zingah hian ni 23 chauha upa nausen pawh a tel. He nausen hi a nu nen Chennai aṭanga haw an ni a, May 20 khan hri an kai tih hriat a ni a, Imphal-a JNIMS Hopital-a Isolation Ward-ah enkawl a ni. Thawhṭanni zan khan naute leh a nu hi an test-na a negative tawh a, nimin khan damdawi-in aṭangin chhuah tir an ni. 

Meghalaya-ah Uttar Pradesh aṭanga haw mi pahnih chu Covid-19 an kai tih hmuh chhuah belh a ni a, an state-a hri kai hmuh tawh hi mi 30 an tling tawh a ni. 

Hri kai zinga 17 chu enkawl mek an ni a, mi 12 erawh enkawl dam an ni tawh thung. 

Chief minister Conrad K Sangma chuan hri kai hmuh thar pahnihte hi West Garo  hills district Chibinang-a qurantine lai an ni tih a sawi.

Nagaland-ah hri kai hi mi pakua hmuh belh an ni a, an vaiin Chennai aṭanga haw vek an ni. Covid-19 kai hmuh tawh hi mi 58 an tling tawh a ni. 

Nagaland health minister S Pangnyu Phom chuan Thawhlehni khan sample 115 test a ni a, heng zing pakua chu a positive tih nimin zing khan a sawi a ni. 

Hri kai hmuh chhuah belh zel an nih vangin cabinet meeting chuan Tourist Lodge, Dimapur-a mi chu Covid-19 hopital-a hman turin a rel. Hemi nen hian Dimapur-ah Covid-19 kaite enkawlna tur pahnih a awm dawn ta a ni. 

Chief minister Neiphiu Rio chuan hri kai hmuh belh zel ni mah se mipuite chu chiai lo turin a chah. Hri kai hmuhte hi ṭha taka enkawl nghal zel an ni tih sawiin, contact tracing pawh neih nghal zel a nih thu a sawi. 

Sikkim-ah nimin khan Delhi aṭanga haw mi pakhatin Covid-19 a kai tih hmuh chhuah a ni a, an state-a hri kai hmuh hi mi pahnih an awm ta a ni. 

Hri kai hmuh thar hi kum 56 mi a ni a, May 25-a Delhi aṭanga haw niin Mining-a quarantine centre-a awm lai a ni. A taksaa natna lang lo, asymptomatic a ni a, quaran­tine centre-a room khata a awmpui, a fapa leh fanu-te erawh an test a negative tih Health and Famil Welfare secretary Dr Pema T Bhutia chuan a sawi. 

Sikkim chuan nimin thleng khan sample 3,525 an test tawh a, heng zinga 2,601 result hriat ni tawhin, a dang chu nghah mek a la ni.

Tripura-ah hri kai mi  48 hmuh belh leh niin, Covid-19 kai hmuh tawh hi mi 469 an tling tawh. 

Hri kai  hmuh thar mi 48 zinga mi 43 hi hmun danga zinna nei vek an ni tih sawiin, mi dang pangate erawh chu a kai tawhte aṭanga an kaichhawn ve leh a ni. 

Chief minister Biplab Kumar Deb chuan hri kai hmuh chhuah an awm belh avangin mipuite fimkhur turin a chah a, sorkarin dan a siamte zawm ṭha tur leh, hri dona kawnga sorkar hmalakna chu theihtawpa thlawp turin a ngen. 

State health department chuan  hri kai zinga 173 chu enkawl dam an ni tawh tih a sawi. 

Tripur-ah hian hian hmun dang aṭang haw, ni 14 chhung khung hrang tura tih zinga 18,858 chuan an hun hi an hmang zo tawh a, mi dang 13,014 chu khung hran mek an la ni.