Barak Valley-ah Leimin vangin 21 thi

Assam-ah ruahsur nasa avangin chhiatna hrang hrang a thleng a, hmun tam takah tui a len bakah, lei min leh lei tawlhte a thleng a ni. 

Thawhlehni khan Barak Valley-ah lei min nasa tak avangin mi 21 in nunna an chan. Chhiatna thlenga thi hi Chachar district-ah mi pasarih, Hailakandi-ah mi pariat leh Karimganj-ah mi paruk an ni. Thi zingah hian naupang pariat an tel. 

Cachar deputy commissioner Keerthi Jalli chuan leiminna hmuna hian chhanchhuah hna thawktute tirh nghal an nih thu sawiin, thi chhungte hnenah zangnadawmna pek tur pawh ngaihtuah nghal a ni, a ti. Cachar district-a leimin vanga thi mi pasarih hi chhungkaw khata mi vek an ni tih district disaster managment authority chuan a sawi bawk.

Assam governor Jagdish Mukhi  leh chief minister Sarbananda Sonowal-te chuan district pathuma chhiatna thleng vanga nunna chan chhungte an tawrhpui thu an sawi. CM chuan chhiatna tawk chhungte ṭanpui leh chhawmdawl hna chu chak taka thawk nghal turin district thuneitute a hrilh  nghal bawk.